Matthew 28
Iesu Mutulu no Anu Soli
(Mak 16:1-8; Luk 24:1-12; Ioa 20:1-10)
1Voxo Tavuna mukalu, xe no kakau manina no anu voxo vile, la Malia sie Maxadala ilo'a Malia ane vile milai no lulu ne. 2Xe alaxu vilesisi 'o la laliua mukunikuni toxoxa'a manina, Xo angelo vile noxou Lataua molu teitexi no opo loxotolo mulu'e mulai no anu lulu ne sou mupipalo'u kulu e mutaluxu lulu anaxu ne muxexenu. Xe mukalu la anu muxolu no anu ne. 3Ia alaiou ne mulamilami loxo lele'e lamixu xe tokolomou veveeni ne mukea loxo tamuxala ne. 4Xe ta mitema sou 'oto'oto e mixolu sou miloosou lulu ne mi'umolu, la mi'olo'olo, la misoisoli vitanisi loxo itema musoli. 5Xe angelo muavuti la muvikalane'i ta sema tamei ne lexe, “Ngingi nga'ume mamu, xo eni elavusou lexe ngingi ngene'e sou lexe ngamaisou Iesu e ta mitema mivau musoli. La mililixu no ovu valautu. 6 aIa Anu uxolu 'o uasi, Anu mutulu loxo Anu mulemolu. Ngamaisou tanixu e ane'i mimulaxu muai no anu a. 7La sou ngalivu ngapasipaa ulai mo ngavikalane'i ta molomolo noxou. Ngavikalane'i lexe Anu mutulu mo mumauli mo muuli mulai ne Xalilaia. La sou ane'i ilai imaisou ane. Eni ene'e sou avikalangengi aloxo ne.” 8Xe ta sema ne milaa no lulu ne sou milai no ale, la mi'ume manina, ia 'osa'ila mu'ana'ana noxi'a kalumo, la sou miiave sou lexe ivikalane'i ta molomolo noxou. 9Ia no mine ane'i miave sou lexe ilai ivikalane'i ta molomolo noxou loxo 'o la ua'a, Iesu alaxu vilesisi 'o la mune'e muxali vaxa noxi'a, la muvikalane'i lexe, “Opongengi uxolu se'isisi.” Xe ane'i miiavuti la milai miteteli no tava'u sou milotu noxou. 10 bLa sou Iesu muvikalane'i aloxo 'o, “Ngaume mamu. Ngalai mo ngavikalane'i ta vivilo lexe ilai ne Xalilaia, la sou imaisilo ane.”A'alo Noxi'a ta Mitema E Miloosou Lulu
11No mine ta sema 'a uao ilalai o, la ta mitema e miloosou lulu ne mi'unalai no nano no tuala tila (Ielusalemu) la mia'aloxu mimii latala e muxali ne noxi'a ta kisi'a ta aili'i. 12Xe ta kisi'a ta aili'i milomu aloxo ne, la ilo'a ta tatilasi'a ta mitema mipita la mixali no anu xavutala vile, la milosi'a ta mitema sou 'oto'oto ne lamoli tatila. 13La mivikalane'i aloxo 'o, “Maasi la ngingi ngavikala aloxo 'o, ‘Ta molomolo noxou mine'e no 'olovoxo no mine nexi teai teva'amiminu, la ane'i mine'e mipakalinu Iesu vasimolu.’ 14Mo sou lexe tila noxi'a ta Romu ulomusou, la nexi mexe tamomosou noxou, la ngingi tu'umaxu vile uxali noxinge uasi.” 15La sou ta mitema sou 'oto'oto ne mino'u lamoli mukalu, la milai mi'oxonu aloxo ane'i mivikalane'ixu ne. La sou a'alo ane ne mulaa mulai muno'a ta Iutaia mukalusi, la muxolu noxi'a mune'e muxali vaimomo 'o.Iesu Mulosi'a ta Molomolo Noxou Xaixai sou I'oxonu
(Mak 16:14-18; Luk 24:36-49; Ioa 20:19-23; Apo 1:6-8)
16 cXe ili'i la ta molomolo noxou mavulovexa mulelia vile milai no alaele ne Xalilaia e anu Iesu muvikalane'ixu lexe ane'i ilai no anu. 17No mine ane'i mimaisou, la ane'i milotu noxou, ia se'i noxi'a ne xavutalai'a tamei. 18 dIesu mune'e 'alai noxi'a la muvikalane'i aloxo 'o, “Lataua mulosilo xavi sou asaxila'u mimii latala teitexi no opo loxotolo xe no lia 'o ukalusi.” 19 eAloxo ne la sou ngingi ngalai no xalexalee tuatuala ukalusi mo nga'oxone'i ta mitema ixali ta molomolo noxilo, mo nga'ulosi'a no ualasou Mamilo mo no ualasou 'Olu xe no ualasou Uleenu Tavuna. 20Mo ngalosie'i sou imulinu mimii latala e eni evikalangengi sou nga'oxonu ne. Mo ngalavu laixe lexe eni axolu noxinge utotomu ulai utalo no 'a voxo sou tuala xalexalee ukalu.
Copyright information for
ATA